MISSALE ROMANUM - Die 12 Februarii. Ss. Septem Fundatorum Ordinis Servorum B. M. V. Confessorum

Missale Romanum > Proprium de Sanctis > Festa Februarii

DIE 12 febrUARII

Ss.  Septem  Fundatorum

Ordinis Servorum B. M. V.

confessorum

Duplex

   Introitus
Sap. 10, 20-21

J

usti decantavérunt, Dómine, nomen sanctum tuum, et victrícem manum tuam laudavérunt páriter : quóniam sapiéntia apéruit os mutum et linguas infántium fecit disértas. Ps. 8, 2. Dómine, Dóminus noster, quam admirábile est nomen tuum in univérsa terra! V/. Glória Patri. Justi.

Oratio

D

ómine Jesu Christe, qui, ad recoléndam memóriam dolórum sanctíssimæ Genitrícis tuæ, per septem beátos Patres nova Servórum ejus família Ecclésiam tuam fœcundásti : concéde propítius; ita nos eórum consociári flétibus, ut perfruámur et gáudiis : Qui vivis.

Et, in Quadragesima, fit Commemoratio Feriæ in Missis non conventualibus.

Léctio libri Sapiéntiæ
Eccli. 44, 1-15

L

audémus viros gloriósos et paréntes nostros in generatióne sua. Multam glóriam fecit Dóminus magnificéntia sua a saéculo. Dominántes in potestátibus suis, hómines magni virtúte et prudéntia sua praéditi, nuntiántes in prophétis dignitátem prophetárum, et imperántes in præsénti pópulo, et virtúte prudéntiæ pópulis sanctíssima verba. In perítia sua requiréntes modos músicos, et narrántes cármina scripturárum. Hómines dívites in virtúte, pulchritúdinis stúdium habéntes : pacificántes in dómibus suis. Omnes isti in generatiónibus gentis suæ glóriam adépti sunt, et in diébus suis habéntur in láudibus. Qui de illis nati sunt, reliquérunt nomen narrándi laudes eórum. Et sunt, quorum non est memória : periérunt, quasi qui non fúerint : et nati sunt, quasi non nati, et fílii ipsórum cum ipsis. Sed illi viri misericórdiæ sunt, quorum pietátes non defuérunt : cum sémine eórum pérmanent bona, heréditas sancta nepótes eórum, et in testaméntis stetit semen eórum : et fílii eórum propter illos usque in ætérnum manent : semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.

Graduale. Is. 65, 23. Elécti mei non laborábunt frustra, neque germinábunt in conturbatióne : quia semen benedictórum Dómini est, et nepótes eórum cum eis. V/. Eccli. 44, 14. Córpora ipsórum in pace sepúlta sunt, et nomen eórum vivit in generatiónem et generatiónem.

Allelúja, allelúja. V/. Ibid., 15. Sapiéntiam ipsórum narrent pópuli, et laudem eórum núntiet Ecclésia. Allelúja.

Post Septuagesimam, omissis Allelúja, et Versu sequenti, dicitur

Tractus. Ps. 125, 5-6. Qui séminant in lácrimis, in exsultatióne metent. V/. Eúntes ibant et fiébant, mitténtes sémina sua. V/. Veniéntes autem vénient cum exsultatióne, portántes manípulos suos.

¶ In Missis votivis Tempore Paschali omittitur Graduale, et ejus loco dicitur :

Allelúja, allelúja. V/. Eccli. 44, 15. Sapiéntiam ipsórum narrent pópuli, et laudem eórum núntiet Ecclésia. Allelúja. V/. Ps. 36, 28. Non derelínquet Dóminus sanctos suos : in ætérnum conservabúntur. Allelúja.

Sequéntia sancti Evangélii secúndum
Matthaéum      Matth. 19, 27-29

I

n illo témpore : Dixit Petrus ad Jesum : Ecce, nos relíquimus ómnia, et secúti sumus te : quid ergo erit nobis? Jesus autem dixit illis : Amen, dico vobis, quod vos, qui secúti estis me, in regeneratióne, cum séderit Fílius hóminis in sede majestátis suæ, sedébitis et vos super sedes duódecim, judicántes duódecim tribus Israël. Et omnis, qui relíquerit domum, vel fratres, aut soróres, aut patrem, aut matrem, aut uxórem, aut fílios, aut agros, propter nomen meum, céntuplum accípiet, et vitam ætérnam possidébit.

Offertorium. Is. 56, 7. Addúcam eos in montem sanctum meum, et lætificábo eos in domo oratiónis meæ : holocáusta eórum et víctimæ eórum placébunt mihi super altáre meum.

Secreta

A

ccipe, quaésumus, Dómine, hóstias quas tibi oférimus : et præsta; ut, intercedéntibus Sanctis tuis, libera tibi mente serviámus, et perdoléntis Vírginis Genitrícis Fílii tui amóre inflammémur. Per eúndem Dóminum.

Et, in Quadragesima, fit Commemoratio Feriæ, ut supra.

Communio. Joann. 15, 16. Ego vos elégi de mundo, ut eátis et fructum afferátis : et fructus vester máneat.

Postcommunio

C

æléstibus refécti mystériis te, Dómine, deprecámur : ut, quorum festa percólimus imitántes exémpla; juxta Crucem Jesu cum María Matre ejus fidéliter astémus, et ejúsdem redemptiónis fructum percípere mereámur. Per eúndem Dóminum.

Et, in Quadragesima, fit Commemoratio Feriæ, ut supra; et de ea legitur Evangelium in fine, juxta Rubricas.

_______________

S. Ignatii Ep. et Mart. | In Purificatione B. Mariæ Virg. | S. Blasii Ep. et Mart. | S. Andreæ Corsini Ep. et Conf. | S. Agathæ Virg. et Mart. | S. Titi Ep. et Conf. | Pro S. Dorothea Virg. et Mart. | S. Romualdi Abb. | S. Joannis de Matha Conf. | S. Cyrilli Ep. Alexandrini, Conf. et Eccl. Doct. | Pro S. Apollonia Virg. et Mart. | S. Scholasticæ Virg. | In Apparitione B. Mariæ Virg. Immaculatæ | Ss. Septem Fundatorum Ordinis Servorum B. M. V., Cc. | S. Valentini Presb. et Mart. | Ss. Faustini et Jovitæ Mm. | S. Simeonis Ep. et Mart. | Cathedra S. Petri Ap. Antiochiæ | S. Petri Damiani Ep., Conf. et Eccl. Doct. | In Vigilia S. Matthiæ Ap. | S. Matthiæ Ap. | S. Gabrielis a Virgine Perdolente Conf.

Ad principium

_______________