MISSALE ROMANUM - Die 1 Julii. PRETIOSISSIMI SANGUINIS D. N. J. C.

FESTA JULII

Prima die mensis in qua fiat Officium de Feria communi, et primo resumenda non sit Missa præcedentis Dominicæ impedita, in Choro post Primam dicitur Missa conventualis pro Defunctis, juxta Rubricas, et in Missis privatis, quæ non sint Defunctorum, pænultimo loco dicitur Oratio Fidélium supra.

____________

Die 1 Julii

PRETIOSISSIMI   SANGUINIS D. N. J. C.

Duplex I classis

   Introitus
Apoc. 5, 9-10

R

edemísti nos, Dómine, in sánguine tuo, ex omni tribu et lingua et pópulo et natióne : et fecísti nos Deo nostro regnum. Ps. 88, 2. Misericórdias Dómini in ætérnum cantábo : in generatiónem et generatiónem annuntiábo veritátem tuam in ore meo. V/. Glória Patri. Redemísti.

Oratio

O

mnípotens sempitérne Deus, qui unigénitum Fílium tuum mundi Redemptórem constituísti, ac ejus Sánguine placári voluísti : concéde, quaésumus, salútis nostræ prétium sollémni cultu ita venerári, atque a præséntis vitæ malis ejus virtúte deféndi in terris; et fructu perpétuo lætémur in cælis. Per eúndem Dóminum.

¶ In Missis votivis omittantur verba sollémni cultu.

Et, in Missis privatis tantum, fit Commemoratio diei Octavæ S. Joannis :

Oratio

D

eus, qui præséntem diem honorábilem nobis in beáti Joánnis nativitáte fecísti : da pópulis tuis spirituálium grátiam gaudiórum; et ómnium fidélium mentes dírige in viam salútis ætérnæ. Per Dóminum.

Léctio Epístolæ beáti Pauli Apóstoli
ad Hebraéos    Hebr. 9, 11-15

F

ratres : Christus assístens Póntifex futurórum bonórum, per ámplius et perféctius tabernáculum non manufáctum, id est, non hujus creatiónis : neque per sánguinem hircórum aut vitulórum, sed per próprium sánguinem introívit semel in Sancta, ætérna redemptióne invénta. Si enim sanguis hircórum, et taurórum, et cinis vítulæ aspérsus, inquinátos sanctíficat ad emundatiónem carnis : quanto magis sanguis Christi, qui per Spíritum Sanctum semetípsum óbtulit immaculátum Deo, emundábit consciéntiam nostram ab opéribus mórtuis, ad serviéndum Deo vivénti? Et ídeo novi testaménti mediátor est : ut morte intercedénte, in redemptiónem eárum prævaricatiónum, quæ erant sub prióri testaménto, repromissiónem accípiant, qui vocáti sunt ætérnæ hæreditátis : in Christo Jesu Dómino nostro.

Graduale. I Joann. 5, 6 et 7-8. Hic est qui venit per aquam et sánguinem, Jesus Christus : non in aqua solum, sed in aqua et sánguine. V/. Tres sunt, qui testimónium dant in cælo : Pater, Verbum, et Spíritus Sanctus; et hi tres unum sunt. Et tres sunt qui testimónium dant in terra : Spíritus, et aqua, et sanguis : et hi tres unum sunt.

Allelúja, allelúja. V/. Ibid., 9. Si testimónium hóminum accípimus, testimónium Dei majus est. Allelúja.

¶ In Missis votivis post Septuagesimam, omissis Allelúja, et Versu sequenti, dicitur

Tractus. Ephes. 1, 6-8. Gratificávit nos Deus in dilécto Fílio suo, in quo habémus redemptiónem per sánguinem ejus. V/. Remissiónem peccatórum, secúndum divítias grátiæ ejus, quæ superabundávit in nobis. V/. Rom. 3, 24-25. Justificáti gratis per grátiam ipsíus, per redemptiónem, quæ est in Christo Jesu. V/. Quem propósuit Deus propitiatiónem per fidem in sánguine ipsíus.

Tempore autem Paschali omittitur Graduale, et ejus loco dicitur :

Allelúja, allelúja. V/. Apoc. 5, 9. Dignus es, Dómine, accípere librum, et aperíre signácula ejus : quóniam occísus es, et redemísti nos Deo in sánguine tuo. Allelúja. V/. Exodi 12, 13. Erit autem sanguis vobis in signum : et vidébo sánguinem, et transíbo vos : nec erit in vobis plaga dispérdens. Allelúja.

Sequéntia sancti Evangélii secúndum
Joánnem             Joann. 19, 30-35

I

n illo témpore : Cum accepísset Jesus acétum, dixit : Consummátum est. Et inclináto cápite trádidit spíritum. Judaéi ergo (quóniam Parascéve erat), ut non remanérent in cruce córpora sábbato (erat enim magnus dies ille sábbati), rogavérunt Pilátum ut frangeréntur eórum crura et tolleréntur. Venérunt ergo mílites : et primi quidem fregérunt crura et alteríus, qui crucifíxus est cum eo. Ad Jesum autem cum veníssent, ut vidérunt eum jam mórtuum, non fregérunt ejus crura, sed unus mílitum láncea latus ejus apéruit, et contínuo exívit sanguis et aqua. Et qui vidit testimónium perhíbuit : et verum est testimónium ejus.

Credo.

Offertorium. I Cor. 10, 16. Calix benedictiónis, cui benedícimus, nonne communicátio sánguis Christi est? et panis quem frángimus, nonne participátio córporis Dómini est?

Secreta

P

er hæc divína mystéria, ad novi, quaésumus, Testaménti mediatórem Jesum accedámus : et super altária tua, Dómine virtútum, aspersiónem sánguinis mélius loquéntem, quam Abel, innovémus. Per eúndem Dóminum.

Pro Oct. S. Joannis                        Secreta

T

ua, Dómine, munéribus altária cumulámus : illíus nativitátem honóre débito celebrántes, qui Salvatórem mundi et cécinit adfutúrum, et adésse monstrávit, Dóminum nostrum Jesum Christum Fílium tuum : Qui tecum vivit.

Præfatio de Cruce.

Communio. Hebr. 9, 28. Christus semel oblátus est ad multórum exhauriénda peccáta : secúndo sine peccáto apparébit expectántibus se in salútem.

Postcommunio

A

ad sacram, Dómine, mensam admissi, háusimus aquas in gáudio de fóntibus Sálvatoris : sanguis ejus fiat nobis, quaésumus, fons aquæ in vitam ætérnam saliéntis : Qui tecum vivit.

Pro Oct. S. Joannis                 Postcommunio

S

umat Ecclésia tua, Deus, beáti Joánnis Baptístæ generatióne lætítiam : per quem suæ regeneratiónis cognóvit auctórem, Dóminum nostrum Jesum Christum Fílium tuum : Qui tecum vivit.

_______________

IN FESTO PRETIOSISSIMI SANGUINIS D. N. J. C. | In Visitatione B. Mariæ Virg. | Pro Ss. Processo et Martiniano Mm. | S. Leonis II Papæ et Conf. | De sexta die infra Octavam Ss. Petri et Pauli App. | S. Antonii Mariæ Zaccaria Conf. | In Octava Ss. Petri et Pauli App. | Ss. Cyrilli et Methodii Epp. et Cc. | S. Elisabeth Reginæ, Vid. | Ss. Septem Fratrum Mm. ac Rufinæ et Secundæ Vv. et Mm. | S. Pii I Papæ et Mart. | S. Joannis Gualberti Abb. | Pro Ss. Nabore et Felice Mm. | S. Anacleti Papæ et Mart. | S. Bonaventuræ Ep., Conf. et Eccl. Doct. | S. Henrici Imperatoris, Conf. | In Commemoratione B. M. V. de Monte Carmelo | S. Alexi Conf. | S. Camilli de Lellis Conf. | Pro Ss. Symphorosa et septem Filiis ejus Mm. | S. Vincenti a Paulo Conf. | S. Hieronymi Æmiliani Conf. | Pro S. Margarita Virg. et Mart. | S. Praxedis Virg. | S. Mariæ Magdalenæ Pœnitentis | S. Apollinaris Ep. et Mart. | Pro S. Liborio Ep. et Conf. | In Vigilia S. Jacobi Ap. | Pro S. Christina Virg. et Mart. | S. Jacobi Ap. | Pro S. Christophoro Mart. | S. Annæ Matris B. Mariæ Virg. | S. Pantaleonis Mart. | Ss. Nazarii et Celsi Mm., Victoris I Papæ. et Mart. ac Innocentii I Papæ. et Conf. | S. Marthæ Virg. | Pro Ss. Felice II Papa Simplicio, Faustino et Beatrice Mm. | Ss. Abdon et Sennen Mm. | S. Ignatii Conf.

Ad principium

_______________