MISSALE ROMANUM - Eadem die 28 Januarii. Pro S. Agnete Virgine et Martyre Secundo

Missale Romanum > Proprium de Sanctis > Festa Januarii

eadem Die 28 Januarii

Pro Sancta agnete

virg. et mart.

Secundo

Introitus
Ps. 44, 13, 15 et 16

V

ultum tuum deprecabúntur omnes dívites plebis : adducántur Regi vírgines post eam : próximæ ejus adducántur tibi in lætítia et exsultatióne. Ps. ibid., 2. Eructávit cor meum verbum bonum : dico ego ópera mea Regi. V/. Glória Patri. Vultum.

Oratio

D

eus, qui nos ánnua beátæ Agnétis Vírginis et Mártyris tuæ sollemnitáte lætíficas : da, quaésumus; ut, quam venerámur officio, étiam piæ conversatiónis sequámur exémplo. Per Dóminum.

Léctio Epístolæ beáti Pauli Apóstoli ad Corínthios
II Cor. 10, 17-18; 11, 1-2

F

ratres : Qui gloriátur, in Dómino glorietur. Non enim, qui seípsum comméndat, ille probátus est; sed quem Deus comméndat. Utinam sustinerétis módicum quid insipiéntiæ meæ, sed ei supportáte me : aémulor enim vos Dei æmulatióne. Despóndi enim vos uni viro vírginem castam exhibére Christo.

Graduale. Ps. 44, 5. Spécie tua et pulchritúdine tua inténde, próspere procéde et regna. V/. Propter veritátem et mansuetúdinem et justítiam : et dedúcet te mirabíliter déxtera tua.

Allelúja, allelúja. V/. Ibid., 15 et 16. Adducéntur Regi vírgines post eam : próximæ ejus afferéntur tibi in lætítia. Allelúja.

Post Septuagesimam, omissis Allelúja, et Versu sequenti, dicitur

Tractus. Ps. 44, 11 et 12. Audi, fília, et vide, et inclína aurem tuam : quia concupívit Rex speciem tuam. V/. Ibid., l3 et 10. Vultum tuum deprecabúntur omnes dívites plebis : fíliæ regum in honóre tuo. V/. Ibid., 15-16. Adducéntur Regi vírgines post eam : próximæ ejus afferéntur tibi. V/. Afferéntur in lætítia et exsultatióne : adducántur in templum Regis.

Sequéntia sancti Evangélii secúndum
Matthaéum Matth. 13, 44-52

I

n illo témpore : Dixit Jesus discípulis suis parábolam hanc : Símile est regnum cælórum thesáuro abscóndito in agro : quem qui invénit homo, abscóndit, et præ gáudio illíus vadit, et vendit univérsa, quæ habet, et emit agrum illum. Iterum símile est regnum cælórum hómini negotiatóri, quærénti bonas margarítas. Invénta autem una pretiósa margaríta, ábiit, et véndidit ómnia, quæ hábuit, et emit eam. Iterum símile est regnum cælórum sagénæ, missæ in mare ei ex omni génere píscium congregánti. Quam, cum impléta esset, educéntes, et secus litus sedéntes, elegérunt bonos in vasa, malos autem foras misérunt. Sic erit in consummatióne saéculi : exíbunt Angeli, et separábunt malos de médio justórum, et mittent eos in camínum ignis : ibi erit fletus et stridor déntium. Intellexístis hæc ómnia? Dicunt ei : Etiam. Ait illis : Ideo omnis scriba doctus in regno cælórum símilis est hómini patrifamílias, qui profert de thesáuro suo nova et vétera.

Offertorium. Ps. 44, 3. Diffúsa est grátia in lábiis tuis : proptérea benedíxit te Deus in ætérnum, et in saéculum saéculi.

Secreta

S

uper has, quaésumus, Dómine, hóstias benedíctio copiósa descéndat : quæ et sanctificatiónem nobis cleménter operétur, et de Mártyrum nos sollemnitáte lætíficet. Per Dóminum.

Communio. Matth. 13, 45-46. Símile est regnum cælórum hómini negotiatóri, quærénti bonas margarítas : invénta autem una pretiósa margaríta, dedit ómnia sua, et comparávit eam.

Postcommunio

S

úmpsimus, Dómine, celebritátis ánnuæ votíva sacraménta : præsta, quaésumus; ut et temporális vitæ nobis remédia praébeant et ætérnæ. Per Dóminum.

_______________

S. Hilarii Ep., Conf. et Eccl. Doct. | Pro S. Felice Presb. et Mart. | S. Pauli primi Erem. C. | Pro S. Mauro Abb. | S. Marcelli I Papæ et Mart. | S. Antonii Abb. | In Cathedra S. Petri Ap. Romæ | Pro S. Prisca Virg. et Mart. | Ss. Marii, Marthæ, Audifacis et Abachum Mm. | Pro S. Canuto Rege Mart. | Ss. Fabiani Papæ et Sebastiani Mm. | S. Agnetis Virg. et Mart. | Ss. Vincentii et Anastasii Mm. | S. Raimundi de Peñafort Conf. | Pro S. Emerentiana Virg. et Mart. | S. Timothei Ep. et Mart. | In Conversione S. Pauli Ap. | S. Polycarpi Ep. et Mart. | S. Joannis Chrysostomi Ep., Conf. et Eccl. Doct. | S. Petri Nolasci Conf. | Pro S. Agnete Virg. et Mart. Secundo | S. Francisci Salesii Ep., Conf. et Eccl. Doct. | S. Martinæ Virg. et Mart. | S. Joannis Bosco Conf.

Ad principium

_______________