Missale Romanum > Proprium de Sanctis > Festa Augusti > Die 2 Augusti. S. Alphonsi Mariæ de Ligorio Ep., Conf. et Eccl. Doct.
DIE 2 Augusti
S. Alphonsi Mariæ de Ligorio
Ep., Conf. et Eccl. Doct.
Duplex
Introitus Luc. 4, 18
S
píritus Dómini super me : propter quod unxit me : evangelizáre paupéribus misit me, sanáre contrítos corde. Ps. 77, 1. Atténdite, pópule meus, legem meam : inclináte aurem vestram in verba oris mei. V). Glória Patri. Spíritus Dómini.
D
eus, qui per beatum Alfónsum Maríam Confessórem tuum atque Pontíficem, animárum zelo succénsum, Ecclésiam tuam nova prole fœcundásti : quaésumus; ut, ejus salutáribus mónitis edócti et exémplis roboráti, ad te perveníre felíciter valeámus. Per Dóminum.
Et fit Commemoratio S. Stephani I Pp. et Mart. :
Oratio
G
regem tuum, Pastor ætérne, placátus inténde : et, per beátum Stéphanum Mártyrem tuum atque Summum Pontíficem, perpétua protectióne custódi; quem totíus Ecclésiæ præstitísti esse pastórem. Per Dóminum.
Léctio Epístolæ beáti Pauli Apóstoli
ad Timótheum 2 Tim. 2, 1-7
C
aríssime : Confortáre in grátia, quae est in Christo Jesu : et quæ audísti a me per multos testes, hæc comménda fidélibus homínibus, qui idónei erunt et álios docére. Labóra sicut bonus miles Christi Jesu. Nemo mílitans Deo ímplicat se negótiis sæculáribus : ut ei pláceat, cui se probávit. Nam et qui certat in agóne, non coronátur, nisi legítime certáverit. Laborántem agrícolam opórtet primum de frúctibus percípere. Intéllige quæ dico : dabit enim tibi Dóminus in ómnibus intelléctum.
Graduale. Ps. 118, 52-53. Memor fui judiciórum tuórum a saéculo, Dómine, et consolátus sum : deféctio ténuit me pro peccatóribus derelinquéntibus legem tuam. V). Ps. 39, 11. Justítiam tuam non abscóndi in corde meo : veritátem tuam, et salutáre tuum dixi.
Allelúja, allelúja. V). Eccli. 49, 3-4. Ipse est diréctus divínitus in pœniténtiam gentis, et tulit abominatiónes impietátis : et gubernávit ad Dóminum cor ipsíus : et in diébus peccatórum corroborávit pietátem. Allelúja.
¶ In Missis votivis post Septuagesimam, omissis Allelúja, et Versu seguenti, dicitur
Tractus. Ps. 34, 13. Ego autem, cum mihi molésti essent, induébar cilício : humiliábam in jejúnio ánimam meam : et orátio mea in sinu meo convertétur. V). Ps. 22, 5. Parásti in conspéctu meo mensam advérsus eos, qui tríbulant me : impinguásti in óleo caput meum, et calix meus inébrians quam præclárus est! V). I Cor. 9, 22. Factus sum infírmis infírmus, ut infírmos lucrifácerem.
Tempore autem Paschali omittitur Graduale, et ejus loco dicitur :
Allelúja, allelúja. V). Ps. 132, 1-2. Ecce quam bonum, et quam jucúndum habitáre fratres in unum : sicut unguéntum in cápite, quod descéndit in barbam, barbam Aaron. Allelúja. V). Joann. 15, 16. Pósui vos, ut eátis, et fructum afferátis : et fructus vester máneat. Allelúja.
Sequéntia sancti Evangélii secúndum
Lucam Luc. 10, 1-9
I
n illo témpore : Designávit Dóminus et álios septuagínta duos : et misit illos binos ante fáciem suam in omnem civitátem et locum, quo erat ipse ventúrus. Et dicébat illis : Messis quidem multa, operárii autem pauci. Rogáte ergo Dóminum messis, ut mittat operários in messem suam. Ite : ecce, ego mitto vos sicut agnos inter lupos. Nolíte portáre sácculum, neque peram, neque calceaménta; et néminem per viam salutavéritis. In quamcúmque domum intravéritis, primum dícite : Pax huic dómui : et si ibi fúerit filius pacis, requiéscet super illum pax vestra : sin autem, ad vos revertétur. In eádem autem domo manéte, edéntes et bibéntes quæ apud illos sunt : dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quæ apponúntur vobis : et curáte infírmos, qui in illa sunt, et dícite illis : Appropinquávit in vos regnum Dei.
Offertorium. Prov. 3, 9 et 27. Honóra Dóminum de tua substantia, et de primítiis ómnium frugum tuárum da ei. Noli prohibére benefácere eum, qui potest : si vales, et ipse bénefac.
Secreta
C
ælésti, Dómine Jesu Christe, sacrifícii igne corda nostra in odórem suavitátis exúre : qui beato Alfónso Maríæ tribuísti et hæc mystéria celebráre, et per éadem hóstiam tibi sanctam seípsum exhibére : Qui vivis.
Pro S. Stephano Secreta
O
blátis munéribus, quaésumus, Dómine, Ecclésiam tuam benígnus illúmina : ut, et gregis tui profíciat ubique succéssus, et grati fiant nómini tuo, te gubernánte, pastóres. Per Dóminum.
Præfatio de Apostolis, ratione Commemorationis.
Communio. Eccli. 50, 1 et 9. Sacérdos magnus, qui in vita sua suffúlsit domum, et in diébus suis corroborávit templum, quasi ignis effúlgens, et thus ardens in igne.
Postcommunio
D
eus, qui beátum Alfónsum Maríam Confessórem tuum atque Pontíficem, fidélem divíni mystérii dispensatórem et præcónem effecísti : ejus méritis, precibúsque concéde; ut fidéles tui et frequénter percípiant, et percipiéndo sine fine colláudent. Per Dóminum.
Pro S. Stephano Postcommunio
R
efectióne sancta enutrítam gubérna, quaésumus, Dómine, tuam placátus Ecclésiam : ut, poténti moderatióne dirécta, et increménta libertátis accípiat et in religiónis integritáte persístat. Per Dóminum.
Eadem die 2 Augusti. Pro S. Stephano I Pp. et Mart.
Scribe | Ad paginam principalem
© 2001 - 2014 Coordinamento di Una Voce delle Venezie. All Rights Reserved.