MISSALE ROMANUM - Eadem die 7 Decembris. In Vigilia Conceptionis Immaculatæ B. Mariæ Virg.

eadem Die 7 Decembris

In Vigilia Conceptionis

immaculatæ

B. Mariæ Virg.

   Introitus
Ps. 65, 16

V

eníte, audíte, et narrábo, omnes qui timétis Deum, quanta fecit Dóminus ánimæ meæ. Ps. ibid., 1-2. Jubiláte Deo, omnis terra : psalmum dícite nómini ejus, date glóriam laudi ejus. V/. Glória Patri. Veníte.
Non dicitur Glória in excélsis.
Oratio

D

eus, qui Unigéniti tui Matrem ab origináli culpa in sua Conceptióne mirabíliter præservásti : da, quaésumus; ut sua nos intercessióne munítos, corde mundos fácias suæ interésse festivitáte. Per eúndem Dóminum.

Et fit Commemoratio Feriæ supra; et pro 3ª Oratione, juxta diversitatem Temporum assignata, dicitur Oratio de Spiritu Sancto supra.

Léctio libri Sapiéntiæ
Eccli. 24, 23-31

E

go quasi vitis fructificávi suavitátem odóris : et flores mei fructus honóris et honestátis. Ego mater pulchræ dilectiónis et timóris et agnitiónis et sanctæ spei. In me grátia omnis viæ et veritátis : in me omnis spes vitæ et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes sæculórum. Qui edunt me, adhuc esúrient : et qui bibunt me, adhuc sítient. Qui audit me, non confundétur : et qui operántur in me, non peccábunt. Qui elúcidant me, vitam ætérnam habébunt.

Graduale. Prov. 9, 1. Sapiéntia ædificávit sibi domum, éxcidit colúmnas septem. V/. Ps. 86, 1-2. Fundaménta ejus in móntibus sanctis : díligit Dóminus portas Sion super ómnia tabernácula Jacob.

Inítium sancti Evangélii secúndum
Matthaéum        Matth. 1, 1-16

L

iber generatiónis Jesu Christi, fílii David, fílii Abraham. Abraham génuit Isaac. Isaac autem génuit Jacob. Jacob autem génuit Judam et fratres ejus. Judas autem génuit Phares et Zaram de Thamar. Phares autem génuit Esron. Esron autem génuit Aram. Aram autem génuit Amínadab. Amínadab autem génuit Naásson. Naásson autem génuit Salmon. Salmon autem génuit Booz de Rahab. Booz autem génuit Obed ex Ruth. Obed autem génuit Jesse. Jesse autem génuit David regem. David autem rex génuit Salomónem ex ea, quæ fuit Uríæ. Sálomon autem génuit Róboam. Róboam autem génuit Abíam. Abías autem génuit Asa. Asa autem génuit Jósaphat. Jósaphat autem génuit Joram. Joram autem génuit Ozíam. Ozías autem génuit Jóatham. Jóatham autem génuit Achaz. Achaz autem génuit Ezechíam. Ezechias autem génuit Manássen. Manásses autem génuit Amon. Amon autem génuit Josíam. Josías autem génuit Jechoníam et fratres ejus in transmigratióne Babylónis. Et post transmigratiónem Babylonis : Jechonías génuit Saláthiel. Saláthiel autem génuit Zoróbabel. Zoróbabel autem génuit Abiud. Abiud autem génuit Elíacim. Elíacim autem génuit Azor. Azor autem génuit Sadoc. Sadoc autem génuit Achim. Achim autem génuit Eliud. Eliud autem génuit Eleázar. Eleázar autem génuit Mathan. Mathan autem génuit Jacob. Jacob autem génuit Joseph, virum Maríæ, de qua natus est Jesus, qui vocátur Christus.

Offertorium. Cant. 6, 2. Ego dilécto meo, et diléctus meus mihi, qui páscitur inter lília.

Secreta

M

únera nostra, Dómine, apud tuam cleméntiam immaculátæ Dei Genetrícis commendet orátio : quam ab omni origináli labe præservásti; ut dignum Fílii tui habitáculum éffici mererétur : Qui tecum.

2ª Secreta de Feria supra, 3ª de Spiritu Sancto supra.

Præfatio communis, juxta Rubricas.

Communio. Cant. 6, 9. Quæ est ista, quæ progréditur quasi auróra consúrgens, pulchra ut luna, elécta ut sol, terríbilis ut castrórum acies ordináta?

Postcommunio

C

oncéde, miséricors Deus, fragilitáti nostræ præsídium : ut, qui immaculátæ Conceptiónis Genetrícis unigéniti Fílii tui festivitátem prævenímus; intercessiónis ejus auxílio a nostris iniquitátibus resurgámus. Per eúndem Dóminum.

2ª Postcommunio de Feria supra, 3ª de Spiritu Sancto supra.

_______________

Die 28 Novembris | In Vigilia S. Andreæ Apostoli | Pro S. Saturnino Mart. | S. Andreæ Apostoli | Die 1 Decembris | S. Bibianæ Virg. et Mart. | S. Francisci Xaverii Conf. | S. Petri Chrysologi Ep. Conf. et Eccl. Doct. | Pro S. Barbara Virg. et Mart. | Pro S. Sabba Abbate | S. Nicolai Ep. et Conf. | S. Ambrosii Ep. Conf. et Eccl. Doct. | In Vigilia Concept. Immaculatæ B. M. V. | IN CONCEPTIONE IMMACULATA B. M. V. | Pro S. Melchiade Papa et Mart. | S. Damasi Papæ et Conf. | S. Luciæ Virg. et Mart. | Die 14 Decembris | In Octava Concept. Immaculatæ B. M. V. | S. Eusebii Ep. et Mart. | Die 19 Decembris | In Vigilia S. Thomæ Apostoli | S. Thomæ Apostoli

Ad principium

_______________