MISSALE ROMANUM - Ritus Absolutionis in Exsequiis Absente Defuncti Corpore

RITUS  ABSOLUTIONIS

IN  EXSEQUIIS  ABSENTE  DEFUNCTI  CORPORE

EX   RITUALI   ROMANO

Post Missam, Celebrans deponit Planetam et Manipulum in plano ad cornu Epistolæ, accipit Pluviale nigri coloris, et, præcedentibus duobus Acolythis, uno cum navicula incensi et thuribulo, altero cum vasculo aquæ benedictæ et aspersorio, post eos Subdiacono cum Cruce, et duobus ceroferariis cum luminaribus accensis, et Clero, accedit cum Diacono a sinistris ad locum tumuli. Subdiaconus cum Cruce sistit se ad pedes tumuli seu lecticæ mortuorum contra Altare, medius inter dictos Acolythos tenentes luminaria; Celebrans vero ex alia parte in capite loci inter Altare et tumulum, aliquantulum versus cornu Epistolæ, ita ut Crucem Subdiaconi respiciat; a sinistris ejus Diaconus, et prope eum alii duo Acolythi deferentes thuribulum et vas aquæ benedictæ. Tunc, omissa Oratione Non intres, etc, a Clero circumstante cantatur R. Líbera me, Dómine, etc, ut supra. Interim ministratur incensum, benedicitur, et imponitur in thuribulum :

Postea dicitur :

Kýrie, eléison. Christe, eléison. Kýrie, eléison.

Mox sScerdos dicit : Pater noster, quod dum secreto continuatur, accipit aspersorium, et circuit tumulum aspergens, atque incensans eodem modo, ut supra dictum est.

Postea dicit :

V/. Et ne nos indúcas in tentatiónem.

R/. Sed líbera nos a malo.

V/. A porta ínferi.

R/. Erue, Dómine, ánimam ejus (ánimas eórum vel eárum).

V/. Requiéscat (-ant) in pace.

R/. Amen.

V/. Dómine, exáudi oratiónem meam.

R/. Et clamor meus ad te véniat.

V/. Dóminus vobíscum.
R/. Et cum spíritu tuo.

   Orémus.
Oratio

A

bsólve, quaésumus, Dómine, ánimam * fámuli tui N. (fámulæ tuæ N., vel ánimas famulórum tuórum N. et N., vel ánimas famulárum tuárum N. et N., velvel ánimas famulórum famularumque tuárum) ab omni vínculo delictórum : ut in resurrectiónis glória inter Sanctos et eléctos tuos resuscitátus respíret (-a) respíret (resuscitáti vel resuscitátæ respírent). Per Christum, Dóminum nostrum. R/. Amen.

Si defunctus fuerit Sacerdos vel Episcopus, in Oratione exprimitur nomen dignitatis.

Loco præcedentis Orationis Celebrans dicere potest Orationem, quæ dicta est in Missa, vel aliam conveniéntem, ut supra, adhibita tamen conclusione brevi.

Deinde Celebrans, faciens crucem manu dextera super tumulum, dicit :

V/. Réquiem ætérnam dona ei (eis), Dómine.

R/. Et lux perpétua lúceat ei (eis).

Et, dicto per Cantores :

V/. Requiéscat (Requiéscant) in pace. R/. Amen.
Celebrans dicit recto tono :
V/. Anima ejus (Animæ eórum vel eárum) et ánimæ ómníum fidélium defunctórum per misericórdiam Dei requiéscant in pace.

R/. Amen.

Deinde cum in Sacristiam, præcedente Cruce, revertuntur, Celebrans inchoat sine cantu Antiphonam Si iniquitátes, et cum Clero recitat Psalmum De profúndis; postea ab omnibus repetitur Antiphona Si iniquitátes, et in sacristia dicuntur Preces ut supra.

Quod si Absolutio facta fuerit pro omnibus fidelibus defunctis, Versus Animæ eórum, Antiphona Si iniquitátes et Psalmus cum Precibus non dicuntur.

Prædictus autem ritus servatur pro defunctis adultis, tam Clericis quam laicis, quando Exsequiæ fiunt absente defuncti corpore, sive in die tertio, septimo, trigesimo et anniversario ab obitu vel depositione defuncti, sive in alio die.

_______________

In Commemoratione Omnium Fidelium Defunctorum | In die Obitus seu Depositionis Defuncti | In Anniversario Defunctorum | In Missis quotidianis Defunctorum | Orationes diversæ pro Defunctis | Absolutio super Feretrum | Absolutio super Tumulum

Ad principium

_______________