MISSALE ROMANUM - Ritus Absolutionis in Exsequiis Præsente Defuncti Corpore

RITUS   ABSOLUTIONIS

IN   EXSEQUIIS   PRÆSENTE   DEFUNCTI   CORPORE

EX   RITUALI   ROMANO

¶ Finita Missa, Celebrans, depositis Casula seu Pianeta et Manipulo in plano ad cornu Epistolæ, accipit Pluviale nigri coloris, Diacono et Subdiacono paratis remanentibus, depositis tamen Manipulis. Tum Subdiaconus accipit Crucem, et, præcedentibus duobus Acolythis, uno cum thuribulo et navicula incensi, alio cum vase aquæ benedictæ et aspersorio. accedit ad feretrum et se sistit ad caput defuncti cum Cruce, medius inter duos Acolythos seu ceroferarios cum candelabris et candelis accensis, Post eum omnes alii de Clero veniunt ordinatim in grudu cum candelis accensis, et stant in circuito feretri : ultimo loco sequitur Celebrans cum Diacono a sinistris, et, facta prius reverentia Altari, sistit se contra Crucem ad pedes defuncti, retro astantibus ei a sinistris duobus Acolythis, uno cum thuribulo et navicula incensi, altero cum vase aquæ benedictæ et aspersorio. Tunc, Diacono tenente librum, junctis manibus absolute dicit sequentem Orationem (nulla numeri aut generis facta mutatione, etiamsi pro pluribus aut pro femina dicatur) :

Oratio

N

on intres in judícium cum servo tuo, Dómine, quia nullus apud te justificábitur homo, nisi per te ómnium peccatórum ei tribuátur remíssio. Non ergo eum, quaésumus, tua judiciális senténtia premat, quem tibi vera supplicátio fídei christiánæ comméndat : sed, grátia tua illi succurrénte, mereátur evádere judícium ultiónis, qui, dum víveret, insignítus est signáculo sanctæ Trinitátis : Qui vivis et regnas in saécula sæculórum. R/. Amen.

Deinde, Cantore incipiente, Clerus circumstans cantat sequens Responsorium :

L

ibéra me, Dómine, * de mórte ætérna, in die illa treménda : * Quando cæli movéndi sunt et terra : † Dum véneris judicáre saéculum per ignem. V/. Tremens factus sum ego, et tímeo, dum discússio vénerit, atque ventúra ira. * Quando cæli movéndi sunt et terra. V/. Dies illa, dies iræ, calamitátis et misériæ, dies magna et amára valde. † Dum véneris judicáre saéculum per ignem. V/. Réquiem ætérnam dona eis, Dómine : et lux perpétua lúceat eis.

Repetitur Líbera me, Dómine, usque ad V/. Tremens.

¶ Dum repetitur Responsorium, Sacerdos, Diacono ministrante, accipit incensum de navicula et ponit in thuribulum, benedicens illud more solito. Finito Responsorio, Cantor cum primo Choro dicit :

Kýrie, eléison.
Et secundus Chorus respondet :
Christe, eléison.

Deinde omnes simul dicunt :

Kýrie, eléison.
Mox Sacerdos dicit alta voce :
Pater noster.

¶ Et secreto continuatur ab omnibus. Ipse interim accipit de manu Diaconi aspersorium aquæ benedictæ, eodemque Diacono comitante a dextris et anteriorem fimbriam pluvialis sublevante, circumiens feretrum, aspergit corpus defuncti aqua benedícta, ter a parte sinistra cadaveris et ter a dextera. Cum transit ante Altare et ante Crucem, quæ est ex adverso, profunde se inclinat, Diacono genuflectente; si transit ante Sacramentum, genuflectit. Deinde, reversus ad locum suum, Diacono ministrante, accipit thuribulum, et eodem modo quo asperserat, circuit feretrum, et corpus incensat; postea, reddito thuribulo, stans in loco suo, Diacono librum apertum ante ipsum tenente, junctis manibus dicit :

V/. Et ne nos indúcas in tentatiónem.

R/. Sed líbera nos a malo.

V/. A porta ínferi.

R/. Erue, Dómine, ánimam ejus.

V/. Requiéscat in pace.

R/. Amen.

V/. Dómine, exáudi oratiónem meam.

R/. Et clamor meus ad te véniat.

V/. Dóminus vobíscum.

R/. Et cum spíritu tuo.

   Orémus.
Oratio

D

eus, cui proprium est miseréri semper et parcere, te súpplices exorámus pro ánima * fámuli tui N. (fámulæ tuæ N.), quam hódie de hoc saéculo migráre jussísti : ut non tradas eam in manus inimíci neque obliviscáris in finem, sed júbeas eam a sanctis Angelis súscipi et ad pátriam paradísi perdúci; ut, quia in te sperávit et crédidit, non pœnas inférni sustíneat, sed gáudia ætérna possídeat. Per Christum, Dóminum. R/. Amen.

Si defunctus fuerit Sacerdos, in Oratione dicatur : pro ánima fámuli tui N. Sacerdótis, quam, ecc.

Finita Oratione, corpus defertur ad sepulcrum, si tunc deferendum sit; dum autem portatur, vel in eodem loco, si tunc non portetur, Clerici cantant Antiphonam :

In paradísum * dedúcant te Angeli : in tuo advéntu suscípiant te Mártyres, et perdúcant te in civitátem sanctam Jerúsalem. Chorus Angelórum te suscípiat, et cum Lázaro quondam páupere ætérnam hábeas réquiem.

Cum autem pervenerit ad sepulcrum, si non sit benedictum, Sacerdos illud benedicit, dicens hanc Orationem :

   Orémus.
Oratio

D

eus, cujus miseratióne ánimæ fidélium requiéscunt, hunc túmulum bene dícere dignáre, eíque Angelum tuum sanctum députa custódem : et quorum quarúmque córpora hic sepeliúntur, ánimas eórum ab ómnibus absólve vínculis delictórum; ut in te semper cum Sanctis tuis sine fine læténtur. Per Christum Dóminum nostrum. R/. Amen.

Si sepulcrum pro uno tantum inserviat, dicatur : et cujus corpus hic sepelítur, ánimam ejus ... lætétur.

Dicta Oratione, Sacerdos aqua benedicta aspergat, deinde incenset corpus defuncti et tumulum.

Quod si sepulcrum jam sit benedictum, omittitur tum benedictio sepulcri, tum aspersio et incensatio corporis ac tumuli.

Deinde, etiamsi corpus tunc ad sepulturam delatum non fuerit, Sacerdos prosequatur Officium, ut infra, quod numquam omittitur; et intonet Antiphonam :

Ego sum. Cant. Benedíctus Dóminus, Deus Israël. Et eréxit.

Canticum Zachariæ
Luc. 1, 68-79

B

enedíctus Dóminus, Deus Israël : * quia visitávit, et fecit redemptiónem plebis suæ :

Et eréxit cornu salútis nobis : * in domo David, púeri sui.

Sicut locútus est per os sanctórum, * qui a saéculo sunt, Prophetárum ejus :

Salútem ex inimícis nostris, * et de manu ómnium, qui odérunt nos :

Ad faciéndam misericórdiam cum pátribus nostris : * et memorári testaménti sui sancti.

Jusjurándum, quod jurávit ad Abraham patrem nostrum, * datúrum se nobis :

Ut sine timóre, de manu inimicórum nostrórum liberáti, * serviámus illi.

In sanctitáte, et justítia coram ipso, * ómnibus diébus nostris.

Et tu, puer, Prophéta Altíssimi vocáberis : * præíbis enim ante fáciem Dómini paráre vias ejus :

Ad dandam sciéntiam salútis plebi ejus : * in remissiónem peccatórum eórum :

Per víscera misericórdiæ Dei nostri : * in quibus visitávit nos, óriens ex alto :

Illumináre his, qui in ténebris, et in umbra mortis sedent : * ad dirigéndos pedes nostros in viam pacis.

Réquiem ætérnam * dona ei, Dómine.

Et lux perpétua * lúceat ei.

Et repetitur Antiphona :

Ego sum resurréctio et vita : qui credit in me, étiam si mórtuus fúerit, vivet : et omnis qui vivit et credit in me, non moriétur in ætérnum.

Postea Sacerdos dicit :

Kýrie, eléison.
Chorus prosequitur :
Christe, eléison. Kýrie, eléison.
Sacerdos :
Pater noster.

Interim corpus, quin circumeat, aspergit :

V/. Et ne nos indúcas in tentatiónem.

R/. Sed líbera nos a malo.

V/. A porta ínferi.

R/. Erue, Dómine, ánimam ejus.

V/. Requiéscat in pace.

R/. Amen.

V/. Dómine, exáudi oratiónem meam.

R/. Et clamor meus ad te véniat.

V/. Dóminus vobíscum.

R/. Et cum spíritu tuo.

   Orémus.
Oratio

F

ac, quǽsumus, Dómine, hanc cum servo tuo defúncto (ancílla tua defúncta) misericórdiam, ut factórum suórum in pœnis non recípiat vicem, qui (quæ) tuam in votis ténuit voluntátem : ut, sicut híc eum (eam) vera fides junxit fidélium turmis; ita illic eum (eam) tua miserátio sóciet angélicis choris. Per Christum Dómínum nostrum. R/. Amen.

Deinde Celebrans, faciens crucem manu dextera super feretrum, dicit :

V/. Réquiem ætérnam dona ei, Dómine.

R/. Et lux perpétua lúceat ei.

Et, dicto per Cantores :

V/. Requiéscant in pace. R/. Amen.

Celebrans dicit recto tono :

V/. Anima ejus et ánimæ ómnium fidélium defunctórum per misericórdiam Dei requiéscant in pace.

R/. Amen.

Deinde cum a sepulcro in ecclesiam vel ab ecclesia in sacristiam, præcedente Cruce, revertuntur, Celebrans inchoat sine cantu Antiphonam Si iniquitátes, et cum Clero recitat Psalmum sequentem :

Psalmus 129

D

e profúndis clamávi ad te, Dómine : * Dómine, exáudi vocem meam :

Fiant aures tuæ intendéntes, * in vocem deprecatiónis meæ.

Si iniquitátes observáveris, Dómine : * Dómine, quis sustinébit?

Quia apud te propitiátio est : * et propter legem tuam sustínui te, Dómine.

Sustínuit ánima mea in verbo ejus : * sperávit ánima mea in Dómino.

A custódia matutína usque ad noctem : * speret Israël in Dómino.

Quia apud Dóminum misericórdia : * et copiósa apud eum redémptio.

Et ipse rédimet Israël, * ex ómnibus iniquitátibus ejus.

Réquiem ætérnam * dona eis, Dómine.

Et lux perpétua * lúceat eis.

Et ab omnibus repetitur tota Antiphona :

Si iniquitátes observáveris, Dómine : Dómine, quis sustinébit?

Deinde in sacristia Sacerdos, antequam paramentis exuatur, dicit sequentes Preces :
Kýrie, eléison.
Christe, eléison.

Kýrie, eléison.

Pater noster secreto usque ad

V/. Et ne nos indúcas in tentatiónem.

R/. Sed líbera nos a malo.

V/. A porta ínferi.

R/. Erue, Dómine, ánimas eórum.

V/. Requiéscant in pace.

R/. Amen.

V/. Dómine, exáudi oratiónem meam.

R/. Et clamor meus ad te véniat.

V/. Dóminus vobíscum.
R/. Et cum spíritu tuo.

   Orémus.
Oratio

F

idélium, Deus, ómnium Cónditor et Redémptor : animábus famulórum famularúmque tuárum remissiónem cunctórum tríbue peccatórum; ut indulgéntiam, quam semper optavérunt, piis supplicatiónibus consequántur : Qui vivis et regnas in saécula sæculórum.

R/. Amen.

V/. Réquiem ætérnam dona eis, Dómine.

R/. Et lux perpétua lúceat eis.

V/. Requiéscant in pace.

R/. Amen.

_______________

In Commemoratione Omnium Fidelium Defunctorum | In die Obitus seu Depositionis Defuncti | In Anniversario Defunctorum | In Missis quotidianis Defunctorum | Orationes diversæ pro Defunctis | Absolutio super Feretrum | Absolutio super Tumulum

Ad principium

_______________