MISSALE ROMANUM - Commune Dedicationis Ecclesiæ

Commune dedicationis ecclesiæ

   Introitus
Gen. 28, 17

T

erríbilis est locus iste : hic domus Dei est et porta cæli : et vocábitur aula Dei (T. P. allelúja, allelúja). Ps. 83, 2-3. Quam dilécta tabernácula tua, Dómine virtútum! concupíscit, et déficit ánima mea in átria Dómini. V/. Glória Patri. Terríbilis.

Oratio

D

eus, qui nobis per síngulos annos hujus sancti templi tui consecratiónis réparas diem, et sacris semper mysteríis repræséntas incólumes : exáudi preces pópuli tui, et præsta; ut, quisquis hoc templum benefícia petitúrus ingréditur, cuncta se impetrásse lætétur. Per Dóminum.

¶ In ipsa die Dedicationis Ecclesiæ et per Octavam, et quando varianda est Oratio, Oratio ut infra.

Léctio libri Apocalýpsis beáti Joánnis
Apóstoli                Apoc. 21, 2-5

I

n diébus illis : Vidi sanctam civitátem Jerúsalem novam descendéntem de cælo a Deo, parátam sicut sponsam ornátam viro suo. Et audívi vocem magnam de throno dicéntem : Ecce tabernáculum Dei cum homínibus, et habitábit cum eis. Et ipsi pópulus ejus erunt, et ipse Deus cum eis erit eórum Deus : et abstérget Deus omnem lácrimam ab óculis eórum : et mors ultra non erit, neque luctus, neque clamor, neque dolor erit ultra, quia prima abjérunt. Et dixit qui sedébat in throno : Ecce nova fácio ómnia.

Graduale. Locus iste a Deo factus est, inæstimábile sacraméntum, irreprehensíbilis est. V/. Deus, cui stat Angelórum chorus, exáudi preces servórum tuórum.

Allelúja, allelúja. V/. Ps. 137, 2. Adorábo ad templum sanctum tuum : et confitébor nómini tuo. Allelúja.

Post Septuagesimam, omissis Allelúja, et Versu sequenti, dicitur

Tractus. Ps. 124, 1-2. Qui confídunt in Dómino, sicut mons Sion : non commovébitur in ætérnum, qui hábitat in Jerúsalem. V/. Montes in circúitu eius, et Dóminus in circúitu pópuli sui, ex hoc nunc et usque in saéculum.

Tempore autem Paschali omittitur Graduale, et ejus loco dicitur :

Allelúja, allelúja. V/. Ps. 137, 2. Adorábo ad templum sanctum tuum : et confitébor nómini tuo. Allelúja. V/. Bene fundáta est domus Dómini supra firmam petram. Allelúja.

Sequéntia sancti Evangélii secúndum
Lucam                 Luc. 19, 1-10

I

n illo témpore : Ingréssus Jesus perambulábat Jéricho. Et ecce vir nómine Zachaéus : et hic prínceps erat publicanórum, et ipse dives : et quærébat vidére Jesum, quis esset : et non póterat præ turba, quia statúra pusíllus erat. Et præcúrrens ascéndit in árborem sycómorum, ut vidéret eum; quia inde erat transitúrus. Et cum venísset ad locum, suspíciens Jesus vidit illum, et dixit ad eum : Zachaée, festínans descénde, quia hódie in domo tua opórtet me manére. Et festínans descéndit, et excépit illum gaudens. Et cum vidérent omnes, murmurábant, dicéntes, quod ad hóminem peccatórem divertísset. Stans autem Zachaéus, dixit ad Dóminum : Ecce dimídium bonórum meórum, Dómine, do paupéribus : et si quid áliquem defraudávi, reddo quádruplum. Ait Jesus ad eum : Quia hodie salus dómui huic facta est : eo quod et ipse filius sit Abrahæ. Venit enim Filius hóminis quaérere, et salvum fácere, quod períerat.

Credo.

Offertorium. I Paral. 29, 17 et 18. Dómine Deus, in simplicitáte cordis mei lætus óbtuli univérsa; et pópulum tuum, qui repértus est, vidi cum ingénti gáudio : Deus Israël, custódi hanc voluntátem, (allelúja.)

In Ecclesia ipsa dedicata

Secreta

A

nnue, quaésumus, Dómine, précibus nostris : ut quicúmque intra templi huius, cujus anníversárium dedicatiónis celebrámus, ámbitum continémur, plena tibi atque perfécta córporis et ánimæ devotióne placeámus; ut, dum hæc vota præséntia réddimus, ad ætérna praémia, te adjuvánte, perveníre mereámur. Per Dóminum.

Extra Ecclesiam ipsam dedicatam

Secreta

A

nnue, quaésumus, Dómine, précibus nostris : ut, dum hæc vota præséntia réddimus, ad ætérna praémia, te adjuvánte, perveníre mereámur. Per Dóminum.

__________________________________________

¶ Præfatio communis, quæ dicitur, etiam Tempore Quadragesimæ, etsi occurrant Commemoratio aliqua aut Octava communis Præfationem propriam habentes, quæ non sint de aliquo Mysterio Domini.

Communio. Matth. 21, 13. Domus mea, domus oratiónis vocabitur, dicit Dóminus : in ea omnis qui petit, áccipit : et qui quærit, ínvenit : et pulsánti aperiétur (T. P. allelúja).

Postcommunio

D

eus, qui de vivis et eléctis lapídibus ætérnum majestáti tuæ praéparas habitáculum : auxiliáre pópulo tuo supplicánti; ut, quod Ecclaésiæ tuæ corporálibus próficit spatíis, spirituálibus amplificétur augmentis. Per Dóminum.

__________________________________________

¶ Pro Commemoratione infra Octavam :

Oratio

D

eus, qui nobis per síngulos annos hujus sancti templi tui consecratiónis réparas diem, et sacris semper mysteríis repræséntas incólumes : exáudi preces pópuli tui, et præsta; ut, quisquis hoc templum benefícia petitúrus ingréditur, cuncta se impetrásse lætétur. Per Dóminum.

__________________________________________

¶ Per Octavam Missa dicitur ut in Festo, sed infra Ocíavam adduntur, juxta Rubricas, Orationes pro Temporum diversitate assignatæ, nempe 2ª de sancta Maria ex Missa votiva de Tempore currenti, 3ª contra persecutores Ecclesiæ, vel pro Papa.

¶ In ipsa Dedicatione Ecclesiæ dicitur præcedens Missa ut supra, præter Orationes sequentes; et sub unica conclusione cum prima additur Oratio Mysterii vel Sancti, in cujus honorem Ecclesia dedicatur.

Oratio

D

eus, qui invisibíliter omnia cóntines, et tamen pro salúte géneris humáni signa tuæ poténtiæ visibíliter osténdis : templum hoc poténtia tuæ inhabitatiónis illústra, et concéde; ut omnes, qui huc deprecatúri convéniunt, ex quacúmque tribulatióne ad te clamáverint, consolatiónis tuæ benefícia consequántur. Per Dóminum.

Secreta

D

eus, eus, qui sacrandórum tibi auctor es múnerum, effúnde super hanc oratiónis domum benedictiónem tuam : ut ab ómnibus, in ea invocántibus nomen tuum, defensiónis tuæ auxilium sentiátur. Per Dóminum.

Postcommunio

Q

uaésumus, omnípotens Deus : ut in hoc loco, quem nómini tuo indígni dedicávimus, cunctis peténtibus aures tuæ pietátis accómodes. Per Dóminum.

¶ In die Dedicationis Altaris dicitur Missa ut in Dedicatione Ecclesiæ, præter Orationes sequentes : quibus similiter, si agatur de Altari fixo, additur sub unica conclusione Oratio Mysterii vel Sancti, in cujus honorem Altare dedicatur.

Oratio

D

eus qui ex omni coaptatióne Sanctórum ætérnum tibi condis habitáculum : da ædificatióni tuæ increménta cæléstia; ut, quorum hic relíquias pio amóre compléctimur, eórum semper méritis adjuvémur. Per Dóminum.

Secreta

D

escéndat, quaésumus, Dómine, Deus noster, Spíritus tuus Sanctus super hoc altáre : qui et pópuli tui dona sanctíficet, et suméntium corda dignánter emúndet. Per Dóminum ... in unitáte ejúsdem Spíritus Sancti.

Postcommunio

O

mnípotens sempitérne Deus, altare hoc, nómini tuo dedicátum, cæléstis virtútis benedictióne sanctífica : et ómnibus in te sperántibus auxílii tui munus osténde; ut et hic sacramentórum virtus et votórum obtineátur efféctus. Per Dóminum.

_______________

In Vigilia Apostolorum | Commune unius aut plurium Summorum Pontificum | Commune unius Martyris extra Tempus Paschale | Commune plurimorum Martyrum extra Tempus Paschale | Commune Martyrum Tempore Paschali | Commune Confessoris Pontificis  | Commune Doctorum | Commune Confessoris non Pontificis | Commune Abbatum | Commune Virginum | Commune non Virginum | Commune Dedicationis Ecclesiæ | Commune Festorum B. Mariæ Virginis | Missæ de sancta Maria in Sabbato

Ad principium

_______________