MISSALE ROMANUM - Dominica Secunda post Epiphaniam

Missale Romanum > Proprium de Tempore

Dominica Secunda

post Epiphaniam

Semiduplex

¶ Si hæc Dominica Secunda, vel alia post Epiphaniam, a supervenienti Septuagesima impediatur, nec sit ei locus post Pentecosten, juxta Rubricas, anticipatur Sabbato cum omnibus privilegiis occurrenti Dominicæ propriis.

   Introitus
Ps. 65, 4

O

mnis terra adóret te, Deus, et psallat tibi : psalmum dicat nómini tuo, Altíssime. Ps. ibid., 1-2. Jubiláte Deo, omnis terra, psalmum dícite nómini ejus : date glóriam laudi ejus. V/. Glória Patri. Omnis.

¶ Dicitur Glória in excélsis in omnibus Dominicis ante Septuagesimam, etiam Sabbato anticipatis, juxta Rubricas. Non dicitur autem in diebus ferialibus, quando resumitur Missa Dominicæ præcedentis.

Oratio

O

mnípotens sempitérne Deus, qui cæléstia simul et terréna moderáris : supplicatiónes pópuli tui cleménter exáudi; et pacem tuam nostris concéde tempóribus. Per Dóminum.

Orationes pro diversitate Temporum assignatæ, ut post diem 29 Decembris supra.

Léctio Epístolæ beáti Pauli Apóstoli
ad Romános          Rom. 12, 6-16

F

ratres : Habéntes donatiónes secúndum grátiam, quæ data est nobis, diferéntes : sive prophétiam secúndum ratiónem fídei, sive ministérium in ministrándo, sive qui docet in doctrína, qui exhortátur in exhortándo, qui tríbuit in simplicitáte, qui præest in sollicitúdine, qui miserétur in hilaritáte. Diléctio sine simulatióne. Odiéntes malum, adhæréntes bono : Caritáte fraternitátis ínvicem diligéntes : Honóre ínvicem præveniéntes : Sollicitúdine non pigri : Spíritu fervéntes : Dómino serviéntes : Spe gaudéntes : In tribulatióne patiéntes : Oratióni instántes : Necessitátibus sanctórum communicántes : Hospitalitátem sectántes. Benedícite persequéntibus vos : benedícite, et nolíte maledícere. Gaudére cum gaudéntibus, flere cum fléntibus : Idípsum ínvicem sentiéntes : Non alta sapiéntes, sed humílibus consentiéntes.

Graduale. Ps. 106, 20-21. Misit Dóminus verbum suum, et sanávit eos : et erípuit eos de intéritu eórum. V/. Confiteántur Dómino misericórdiæ ejus : et mirabília ejus fíliis hóminum.

Allelúja, allelúja. V/. Ps. 148, 2. Laudáte Dóminum, omnes Angeli ejus : laudáte eum, omnes virtútes ejus. Allelúja.

¶ Sic dicitur Allelúja cum suo Versu post Graduale in omnibus Domini cis minori bus post Epiphaniam, etiam si Missa Dominicæ in Feriis resumatur.

Sequéntia sancti Evangélii secúndum
Joánnem               Joann. 2, 1-11

I

n illo témpore : Núptiæ factæ sunt in Cana Galilaéæ : et erat Mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit Mater Jesu ad eum : Vinum non habent. Et dicit ei Jesus : Quid mihi et tibi est, múlier? nondum venit hora mea. Dicit Mater ejus minístris : Quodcúmque díxerit vobis, fácite. Erant autem ibi lapídeæ hýdriæ sex pósitæ secúndum purificatiónem Judæórum, capiéntes síngulæ metrétas binas vel ternas. Dicit eis Jesus : Impléte hýdrias aqua. Et implevérunt eas usque ad summum. Et dicit eis Jesus : Hauríte nunc, et ferte architriclíno. Et tulérunt. Ut autem gustávit architriclínus aquam vinum fáctam, et non sciébat unde esset, minístri autem sciébant, qui háuserant aquam : vocat sponsum architriclínus, et dicit ei : Omnis homo primum bonum vinum ponit : et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilaéæ : et manifestávit glóriam suam, et credidérunt in eum discípuli ejus.

Credo.

Offertorium. Ps. 65, 1-2 et 16. Jubiláte Deo, univérsa terra : psalmum dícite nómini ejus : veníte et audíte, et narrábo vobis, omnes qui timétis Deum, quanta fecit Dóminus ánimæ meæ, allelúja.

Secreta

O

bláta, Dómine, múnera sanctífica : nosque a peccatórum nostrórum máculis emúnda. Per Dóminum.

Aliæ Secretæ, ut supra.

Præfatio de Ssma Trinitate.

Communio. Joann. 2, 7, 8, 9 et 10-11. Dicit Dóminus : Implete h ýdrias aqua et ferte architriclíno. Cum gustásset architriclínus aquam vinum factam, dicit sponso : Servásti bonum vinum usque adhuc. Hoc signum fecit Jesus primum coram discípulis suis.

Postcommunio

A

ugeátur in nobis, quaésumus, Dómine, tuæ virtútis operatio : ut divínis vegetáti sacraméntis, ad eórum promíssa capiénda, tuo múnere præparémur. Per Dóminum nostrum.

Aliæ Postcommuniones, ut supra.

_______________

IN NATIVITATE DOMINI | S. Stephani Protomartyris | S. Joannis Ap. et Ev. | Ss. Innocentium Martyrum | Dominica infra Octavam Nativitatis | S. Thomæ Ep. et Mart. | De Sexta Die infra Octavam Nativitatis | S. Silvestri I Papæ et Conf. | In Circumcisione Domini | Sanctissimi Nominis Jesu | In Oct. S. Stephani Protomartyris | In Oct. S. Joannis Ap. et Ev. | In Oct. Ss. Innocentium Martyrum | In Vigilia Epiphaniæ | Pro S. Telesphoro Papa et Mart. | In Epiphania Domini | Sanctæ Familiæ Jesu, Mariæ, Joseph | Dominica infra Oct. Epiphaniæ | Pro S. Hygino Papa et Mart. | In Octava Epiphaniæ | Dominica Secunda post Epiphaniam | Dominica Tertia post Epiphaniam | Dominica Quarta post Epiphaniam | Dominica Quinta post Epiphaniam | Dominica Sexta post Epiphaniam

Ad principium

_______________