MISSALE ROMANUM - Dominica Secunda post Pascha

dominica  secunda

post pascha

Semiduplex

Introitus                                   Ps. 138, 18 et 5-6

M

isericórdia Dómini plena est terra, allelúja : verbo Dómini cæli firmáti sunt, allelúja, allelúja. Ps. ibid., 1. Exsultáte, justi, in Dómino : rectos decet collaudátio. V). Glória Patri. Misericórdia.

Oratio

D

eus, qui in Fílii tui humilitáte jacéntem mundum erexísti : fidélibus tuis perpétuam concéde lætítiam; ut, quos perpétuæ mortis eripuísti cásibus, gáudiis fácias pérfrui sempitérnis. Per eúndem Dóminum.

Orationes pro diversitate Temporum assignatæ, ut supra ante Missam Dominicæ in Albis.

Léctio Epístolæ beáti Petri Apóstoli
I Petr. 2, 21-25

C

aríssimi : Christus passus est pro nobis, vobis relínquens exémplum, ut sequámini vestígia ejus. Qui peccátum non fecit, nec invéntus est dolus in ore ejus : qui cum maledicerétur, non maledicébat : cum paterétur, non comminabátur : tradébat autem judicánti se injúste : qui peccáta nostra ipse pértulit in córpore suo super lignum : ut, peccátis mórtui, justítiæ vivámus : cujus livóre sanáti estis. Erátis enim sicut oves errántes, sed convérsi estis nunc ad pastórem et epíscopum animárum vestrárum.

Allelúja, allelúja. V). Luc. 24, 35. Cognovérunt discípuli Dóminum Jesum in fractióne panis. Allelúja. V). Joann. 10, 14. Ego sum pastor bonus : et cognósco oves meas, et cognóscunt me meæ. Allelúja.

Sequéntia sancti Evangélii secúndum
Joánnem          Joann. 10, 11-16

I

n illo témpore : Dixit Jesus pharisaéis : Ego sum pastor bonus. Bonus pastor ánimam suam dat pro óvibus suis. Mercenárius autem et qui non est pastor, cujus non sunt oves própriæ, videt lupum veniéntem, et dimíttit oves et fugit : et lupus rapit et dispérgit oves : mercenárius autem fugit, quia mercenárius est et non pértinet ad eum de óvibus. Ego sum pastor bonus : et cognósco meas, et cognóscunt me meæ. Sicut novit me Pater, et ego agnósco Patrem, et ánimam meam pono pro óvibus meis. Et álias oves hábeo, quæ non sunt ex hoc ovíli : et illas opórtet me addúcere, et vocem meam áudient, et fiet unum ovíle et unus pastor.

Credo.

Offertorium. Ps. 62, 2 et 5. Deus, Deus meus, ad te de luce vígilo : et in nómine tuo levábo manus meas, allelúja.

Secreta

B

enedictiónem nobis, Dómine, cónferat salutárem sacra semper oblátio : ut, quod agit mystério, virtúte perfíciat. Per Dóminum.

Aliæ Secretæ, ut supra.

Præfatio Paschalis, in qua dicitur : in hoc potíssimum gloriósius prædicáre.

Communio. Joann. 10, 14. Ego sum pastor bonus, allelúja : et cognósco oves meas, et cognóscunt me meæ, allelúja, allelúja.

Postcommunio

P

ræsta nobis, quaésumus, omnípotens Deus : ut, vivificatiónis tuæ grátiam consequéntes, in tuo semper múnere gloriémur. Per Dóminum.

Aliæ Postcommuniones, ut supra.

_______________

DOMINICA RESURRECTIONIS | Feria Secunda infra Octavam Paschæ | Feria Tertia infra Octavam Paschæ | Feria Quarta infra Octavam Paschæ | Feria Quinta infra Octavam Paschæ | Feria Sexta infra Octavam Paschæ | Sabbato in Albis | Dominica in Albis in Octava Paschæ | Dominica Secunda post Pascha | Dominica Tertia post Pascha | Dominica Quarta post Pascha | Dominica Quinta post Pascha | In Litaniis Majoribus et Minoribus | In Vigilia Ascensionis | IN ASCENSIONE DOMINI | Dominica infra Octavam Ascensionis | Sabbato in Vigilia Pentecostes | DOMINICA PENTECOSTES | Feria Secunda infra Octavam Pentecostes | Feria Tertia infra Octavam Pentecostes | Feria Quarta Quatuor Temporum Pentecostes | Feria Quinta infra Octavam Pentecostes | Feria Sexta Quatuor Temporum Pentecostes | Sabbato Quatuor Temporum Pentecostes

Ad principium

_______________