MISSALE ROMANUM - Dominica Secunda in Quadragesima

Missale Romanum > Proprium de Tempore

Dominica Secunda

in Quadragesima

   I classis
Semiduplex

Statio ad S. Mariam in Dominica

   Introitus
Ps. 24, 6, 3 et 22

R

eminíscere miseratiónum tuárum, Dómine, et misericórdiæ tuæ, quæ a sæculo sunt : ne umquam dominéntur nobis inimíci nostri : líbera nos, Deus Israël, ex ómnibus angústiis nostris. Ps. ibid., 1-2. Ad te, Dómine levávi ánimam meam : Deus meus, in te confído, non erubéscam. V/. Glória Patri. Reminíscere.

Oratio

D

eus, qui cónspicis omni nos virtúte destítui : intérius exteriúsque custódi; ut ab ómnibus adversitátibus muniámur in córpore, et a pravis cogitatiónibus mundémur in mente. Per Dóminum.

Aliæ Orationes, ut supra.

Lectio Epístolæ beáti Páuli Apóstoli
ad Thessalonicénses   I Thess. 4, 1-7

F

ratres : Rogámus vos et obsecrámus in Dómino Jesu, ut quemádmodum accepístis a nobis, quómodo opórteat vos ambuláre et placére Deo, sic et ambulétis, ut abundétis magis. Scitis enim quæ præcépta déderim vobis per Dóminum Jesum. Hæc est enim volúntas Dei, sanctificátio vestra, ut abstineátis vos a fornicatióne, ut sciat unusquísque vestrum vas suum possidére in sanctificatióne et honóre : non in passióne desidérii, sicut et Gentes, quæ ignórant Deum : et ne quis supergrediátur, neque circumvéniat in negótio fratrem suum : quóniam vindex est Dóminus de his ómnibus, sicut prædíximus vobis et testificáti sumus. Non enim vocávit nos Deus in immundítiam, sed in sanctificatiónem : in Christo Jesu Dómino nostro.

Graduale. Ps. 24, 17-18. Tribulatiónes cordis mei dilatátæ sunt : de necessitátibus meis éripe me, Dómine. Vide humilitátem meam et labórem meum : et dimítte ómnia peccáta mea.

Tractus. Ps. 105, 1-4. Confitémini Dómino, quóniam bonus : quóniam in sæculum misericórdia ejus. Quis loquétur poténtias Dómini : audítas fáciet omnes laudes ejus? Beáti qui custódiunt judícium, et fáciunt justítiam in omni témpore. Meménto nostri Dómine in beneplácito pópuli tui : vísita nos in salutári tuo.

Sequéntia sancti Evangélii secúndum
Matthaéum          Matth. 17, 1-9

I

n illo témpore : Assúmpsit Jesus Petrum, et Jacóbum, et Joánnem fratrem ejus, et duxit illos in montem excélsum seórsum : et transfigurátus est ante eos. Et resplénduit fácies ejus sicut sol : vestiménta autem ejus facta sunt alba sicut nix. Et ecce apparuérunt illis Móyses, et Elías cum eo loquéntes. Respóndens autem Petrus, dixit ad Jesum : Dómine, bonum est nos hic esse : si vis, faciámus hic tria tabernácula, tibi unum, Móysi unum, et Elíæ unum. Adhuc eo loquénte, ecce nubes lúcida obumbrávit eos. Et ecce vox de nube, dicens : Hic est Fílius meus diléctus, in quo mihi bene complácui : ipsum audíte. Et audiéntes discípuli, cecidérunt in fáciem suam, et timuérunt valde. Et accéssit Jesus, et tétigit eos : dixítque eis : Súrgite, et nolíte timére. Levántes autem óculos suos, néminem vidérunt, nisi solum Jesum. Et descendéntibus illis de monte, præcépit eis Jesus, dicens : Némini dixéritis visiónem, donec Fílius hóminis a mórtuis resúrgat.

Offertorium. Ps. 118, 47 et 48. Meditábor in mandátis tuis, quæ diléxi valde : et levábo manus meas ad mandáta tua, quæ diléxi.

Secreta

S

acrifíciis præséntibus, Dómine, quæsumus, inténde placátus : ut et devotióni nostræ profíciant et salúti. Per Dóminum.

Aliæ Secretæ, ut supra.

Præfatio de Quadragesima.

Communio. Ps. 5, 2-4. Intéllige clamórem meum : inténde voci oratiónis meæ, Rex meus, et Deus meus : quóniam ad te orábo, Dómine.

Postcommunio

S

úpplices te rogámus, omnípotens Deus : ut, quos tuis réficis sacraméntis, tibi étiam plácitis móribus dignánter deservíre concédas. Per Dóminum.

Aliæ Postcommuniones, ut supra.

_______________

Feria Quarta Cinerum | Feria Quinta post Cineres | Feria Sexta post Cineres | Sabbato post Cineres | Dominica Prima in Quadragesima | Feria Secunda | Feria Tertia | Feria Quarta Quatuor Temporum Quadragesimæ | Feria Quinta | Feria Sexta Quatuor Temporum Quadragesimæ | Sabbato Quatuor Temporum Quadragesimæ | Dominica Secunda in Quadragesima | Feria Secunda | Feria Tertia | Feria Quarta | Feria Quinta | Feria Sexta | Sabbato | Dominica Tertia in Quadragesima | Feria Secunda | Feria Tertia | Feria Quarta | Feria Quinta | Feria Sexta | Sabbato | Dominica Quarta in Quadragesima | Feria Secunda | Feria Tertia | Feria Quarta | Feria Quinta | Feria Sexta | Sabbato

Ad principium

_______________