Missale Romanum > Missæ Votivæ > I Quæ loco Conventualis de feria communi in Choro suffici possunt > Feria Quarta. Missa votiva de S. Joseph
Vangelo
Feria IV
Missa de Sancto Joseph
Introitus Ps. 32, 20-21
A
djútor, et prótector noster est Dóminus : in eo lætábitur cor nostrum, et in nómine sancto ejus sperávimus (T. P. allelúja, allelúja). Ps. 79, 2. Qui regis Israël inténde : qui dedúcis, velut ovem, Joseph. V). Glória Patri. Adjútor.
D
eus, qui ineffábili providéntia beátum Joseph sanctíssimæ Genitrícis tuæ sponsum elígere dignátus es : præsta, quaésumus; ut, quem protectórem venerámur in terris, intercessórem habére mereámur in cælis : Qui vivis et regnas.
¶ Si dicenda sit Oratio ad poscenda suffragia Sanctorum, in ea omittantur verba beáto Joseph.
Léctio libri Génesis
Gen. 49, 22-26
F
ílius accréscens Joseph, fílius accréscens, et decórus aspéctu : fíliæ discurrérunt super murum. Sed exasperavérunt eum, et jurgáti sunt, inviderúntque illi habéntes jácula. Sedit in forti arcus ejus, et dissolúta sunt víncula brachiórum et mánuum illíus per manus poténtis Jacob : inde pastor egréssus est, lapis Israël. Deus patris tui erit adjútor tuus, et Omnípotens benedícet tibi benedictiónibus cæli désuper, benedictiónibus abýssi jacéntis deórsum, benedictiónibus úberum et vulvæ. Benedictiónes patris tui confortátæ sunt benedictiónibus patrum ejus, donec veníret desidérium cóllium æternórum : fiant in cápite Joseph, et in vértice Nazaraéi inter frates suos.
Graduale. Ps. 20, 4-5. Dómine, prævenísti eum in benedictiónibus dulcédinis : posuísti in cápite ejus corónam de lápide pretióso. V). Vitam pétiit a te, et tribuísti ei longitúdinem diérum in saéculum sǽculi.
Allelúja, allelúja. V). Fac nos innócuam, Joseph, decúrrere vitam : sitque tuo semper tuta patrocínio. Allelúja.
Post Septuagesimam, omissis Allelúja, et Versu sequenti, dicitur
Tractus. Ps. 111, 1-3. Beátus vir, qui timet Dóminum : in mandátis ejus cupit nimis. V). Potens in terra erit semen ejus : generátio rectórum benedicétur. V). Glória et divítiæ in domo ejus : et justítia ejus manet in saéculum sǽculi.
Tempore autem Pascali omittitur Graduale, et ejus loco dicitur :
Allelúja, allelúja. V). De quacúmque tribulatióne clamáverint ad me, exáudiam eos, et ero protéctor eorum semper. Allelúja. V). Fac nos innócuam, Joseph, decúrrere vitam : sitque tuo semper tuta patrocínio. Allelúja.
Sequéntia sancti Evangélii secúndum
Lucam Luc. 3, 21-23
I
n illo témpore : Factum est autem cum baptizarétur omnis pópulus, et Jesu baptizáto, et oránte, apértum est cælum : et descéndit Spíritus Sanctus corporáli spécie sicut colúmba in ipsum : et vox de cælo facta est : Tu es Fílius meus diléctus, in te complácui mihi. Et ipse Jesus erat incípiens quasi annórum trigínta, ut putabátur, fílius Joseph.
Offertorium. Ps. 147, 12 et 13. Lauda Jerúsalem Dóminum : quóniam confortávit seras portárum tuárum, benedíxit fíliis tuis in te (T. P. allelúja).
Secreta
S
anctíssimæ Genitrícis tuæ sponsi patrocínio suffúlti, rogámus, Dómine, cleméntiam tuam : ut corda nostra fácias terréna cuncta despícere, ac te verum Deum perfécta caritáte dilígere : Qui vivis.
Præfatio de S. Joseph Et te in Veneratióne.
Communio. Matth. 1, 16. Jacob autem génuit Joseph virum Maríæ, de qua natus est Jesus, qui vocátur Christus (T. P. allelúja).
Postcommunio
D
ivíni múneris fonte refécti, quaésumus, Dómine Deus noster : ut, sicut nos facis beáti Joseph protectióne gaudére; ita, ejus méritis et intercessióne cæléstis glóriæ fácias esse partícipes. Per Dóminum.
¶ Si dicenda sit Postcommunio ad poscenda suffragia Sanctorum, in ea omittantur verba beáto Joseph.
Item Feria Quarta. Missa de Ss. Petro et Paulo App.
Scribe | Ad paginam principalem
© 2001 - 2014 Coordinamento di Una Voce delle Venezie. All Rights Reserved.